1337 April 16. Brieg

Steuerprivileg für Brieg, Grottkau und Ohlau.

Ir Bolezlaw von gotis genaden herzoge von Slezien unde herre zcu Legnitz tun zcu wyssen alle den, di desen bryf sen, horen odir lezen, das durch hulfe, dy unse getruwen, manne, ritter unde knechte in unsem Lande zcu dem Brige, zcu Grotkow unde zcu der Olow, unde unse getruwen burger zcu dem Bryge, zcu Grotkow unde zcu Olaw, dy si uns nu zcu unsir not tun unde offte getan han zcu nutze unde zcu vrumen, unde durch eyns gutyn aldirs willen, unser vorgenante mannen unde burgern zcu dem Bryge, zcu Grotkow unde zcu der Olow gelobe wir in guten truwen an allirleye argelist, das wir alle unsir man, ir schultheysen, knechte unde gebuwir unde alle unse burger zcu dem Bryge, zcu Grotkow unde zcu der Olow, arme unde riche sullen von desem tage vorbasme, dy wyle wir leben, lozen by irme rechten geschosse unde by allem irme rechte unde vriet, das sie bewysen mugen mit irre wyssen, wy das mit rechte an sy kumen si, das unse man unde burger noch irre wyssene unde (ane?) unsir wedyr rede vor eyn recht intscheide also beschedinlich, das unse man von irme gute, das uns geschos schu(l)dic ist, nicht me sullen geben wen von der cleynen hufen eynen virdunc zcu geschosse unde eyn lot zcu munczegelde, von der grosen hufen nun scot zcu geschosse unde czvey scot zcu munczegelde uf sente Walpurge tage unde dornoch uf sente Michils tage abir eynen virdunc von der cleynen hufen zcu geschosse unde eyn lot zcu munczegelde unde dry scheffil getreydis, eynen korns, eynen gerste unde eynen havir, von der grosen hufen nun scot zcu geschosse unde zcvey scot zcu munczegelde unde funftehalben scheffil dryerleye getreydis. Wir geben ouch zcu genaden unsen mannen, wenne man unse geschos adir munczegelt schribet noch der hufen zcal, das man eynen vor den andern, dy das ir gegeben han, nicht pfendin sal; wer abir das, das unse man, ere schulteysen unde gebuver eyn summe machten von irme gute, dyselbe summe sullen sy uns gandz antvorten von demselbin gute, unde wo des ich (!) gebreche, do sol man den schultheysen vmme pfenden, unde unse burger zcu dem Brige sullen uns ouch nicht me alle iar wenne zcvey hundirt marc geben zcu geschosse unde drysec marc zcu munczgelde, des selben geldes sol(len) si geben uf sente Walpurge tac hundirt marc geschossis unde funfzcen marc munczegeldis unde uf sente Michils tac abir hundirt marc geschosses unde funfzcen marc munczegeldis, unde unse burger zcu Grotkow sollen ouch uns geben virzvc marc zcu geschosse unde zceyne zcu munczegelde uf dyselben tage, uf sente Walpurge tac zcventzic mark geschossis unde funfe munczegeldis unde uf sente Michils tac abir zcventzic marc geschossis unde funf marc munczegeldis, unde unse burger von der Olow sollen ouch uns geben dryseg marc zcu geschosse unde auchte zcu munczegelde, uf sente Walpurge tac funfczen marc geschossis unde vir marc munczegeldis, uf sente Michils tac abir funfzcen marc geschossis unde vir marc munczegeldis. Zcu der selben rede heyse wir vorbinden unde voreynen sich unse voregenanten man unde burger, gemenlich arme und riche zcu dem Bryge, zcu Grotkow unde zcu der Olow in desen bryf, also ab wir se wolden adir ymant unser anwalden ubir ir recht geschos twyngin, also dovor stet geschreben, adir gewalt adir unrecht wolden tun, das sie sich sollen selber man unde burger kegen uns unde unsen anwalden irs rechten vortedingen unde eynander helfin unde raten, das sie von uns unde von unsen anwalden gewaldis, unrechtis, getwangis sin dirlozen. Darnoch gebe wir zcu sundirlichen gnaden unsen ofgenanten mannen unde burgern, ab wir by unsem lebenden libe unse sune, ir eynen adir beyde gewaldic wolden machen unses landis, das wir man unde burger nicht andirs an si wysen sollen, wen das si bi demselben rechte unde gnaden bliben, dy wyle wir lebin, also dovor stet geschreben. Vnde ubir di selbe redde sullen unse man unde burger mit inandir sich vorbinden, dy wyle wir leben, mit eren bryfen, unde an dyselben bryffe wolle wir unse ingesegil heyngen zcu eyme urkunde der worheyt, unde das dese rede stete unde gancz blibe, dy wile das wir leben, so geben wir desen bryf undir unsem ingesegil, unde ist gesehen zcu dem Bryge an der crummen myttewochen von gotis geburde thusint iar dryhundirt iar in dem sehen undrysegestem iar; des sind gezcuege unse getruwen man her Hannus Zcambor, her Hentzke von Pogrella, her Thamme von der Sterza, her Petyr Podusca, her Gunther von Pogrella, her Herman von Kethelis, unse riter, unse obirste schriber Johannes von Schellindorf unde Gerlach unse schriber, der desen bryf hat geschreben.

An rothen und gelben Seidenfäden das Reitersiegel des Herzogs wie bei No. XXIII.

Codex Diplomaticus Silesiae, hrsg vom Vereine für Geschichte und Alterthum Schlesiens, Bd 9, Urkunden der Stadt Brieg. Urkundliche und chronikalische nachrichten über die Stadt Brieg, die dortigen Klöster, die Stadt- und Stiftsgüter bis zum Jahre 1550. Hrsg Dr. C. Grünhagen, Breslau 1870.